Хөтөчтэй аялал - 3

Вашингтон дахь "Монгол соёлын төв" гэдэг байгууллагаас энд амьдардаг монголчуудын дунд амралтын өдрүүдийг тохиолдуулан "Хөтөчтэй аялал" зохион байгуулдаг юм байна. Өмнөх аялалуудын тухай тэдний сайтуудаас үзээд их сонирхолтой санагдсан тул энэ удаагийнхад нь оролцохоор эртнээс төлөвлөсөн билээ. Энэ аялалаар Вашингтон хотын төвөөс холгүй Потомак голын эрэг дээр байдаг ерөнхийлөгч агсан Франклин Рузвельтийн дурсгалын цэцэрлэгээр аялсан.
Энэ хотод ирээд 2 жил гаран болж байгаа ч үзсэн зүйлээр маруухан, гадуур ганцаараа алхавч цөөн хэдэн газраар хальт ороод л, дороо залхаад харих гээл яарчихна.
Харин энэ удаа хөтчийн тайлбарыг сонсож, олон хүнтэй хамт явсан болохоор аялал сонирхолтой байлаа. За тэгээд ноён Рузвельтын талаар олж сонссон сонин сайхан гэвэл тэрээр 1930-аад оны Америкийн "их хямралын" үед ардчилсан намаас сонгогдон ард түмнээ ядуурлаас гэтэлгэж, нийгэмд ардчилал, шударга ёс, тэгш байдлыг бэхжүүлэхэд чухал хувь нэмэр оруулсан хүн юм байна.

Хөтчийн хэлснээр тэр үед ард түмний олонх нь ядуу, төлбөрийн чадвар муу байснаас бүтээгдэхүүний борлуулалт багасаж, тэр хэрээр банкны зээл дээр тогтон үйлдвэрлэл явуулж байсан олон үйлдвэрүүд хаалгаа барин дампуурч, улмаар банкууд үйл ажиллагаа явуулах боломжгүй болж, нийгэмд ажилгүйдэл дээд цэгтээ хүрчээ. Энэ үед ардчилсан намаас ерөнхийлөгчөөр сонгогдон гарч ирсэн Рузвельт зоригтой алхмууд хийсний үр дүнд Америкт татварын зөв систем бүрдэж, татвараас олсон мөнгөнөөс эргээд ядуусын амьдралд нэмэр болох нийгмийн даатгалын санг бий болгожээ.
Бас манай улсын хувь заяатай холботой баримт гэвэл ЗХУ, Англи улсын удирдлагуудтай хамт Ялтын гэрээг хэлэлцэн, үүгээрээ Монгол улсын тусгаар тогтнолын зарлан тунхаглахад их үүрэг гүйцэтгэжээ.
За энэ мэт сонирхолтой түүхийг яриулсаар, сонссоор энэ удаагийн аялал маань сонирхолтой, танин мэдэхүйн ач холбогдолтой сайхан л боллоо. Аялалын дараа бүгдээрээ голын эрэг дээр тухлан сууж, гэр гэрээсээ бэлдэж ирсэн хоолоо дэлгэн сайхан хооллосон. Хоол идэх зуураа хүмүүс хол ойрын сонин сайхан хуучилж, энэ өдрийг зугаатай өнгөрөөсөн юм байна.

Зургийн тайлбар:

1- р зураг: Ерөнхийлөгчийн ард түмнээ зоригжуулан хэлсэн үгсийг арааживаар чих тавин сонсож байна.
2-р зураг: Аялалын групп хөтөчийн хамт
3-р зураг: Ажил олгох товчооны үүдэн дээр хүмүүс ажилд оочерлож байна.

Дараагийн аялал 11-р сарын 3-нд Конгрессын номын сангаар аялана гэнэ лээ. Энэ номын сан нь хэмжээ, цар хүрээгээрээ улсдаа хамгийн томд ордог ба дотроо монгол номын тасагтай гэсэн. Ингээд дараа дараагийн аялалд улам олон монголчууд оролцоосой гэж хүсээд, цаг зав гарган энэ арга хэмжээг зохиож байгаа соёлын төвийнхөнд талархан, улам их амжилт хүсэн ерөөе.